Santxo Jakitunak duela zortzi mende baino gehiago sortu zuen Gasteiz, eta oraindik ere Erdi Aroko arbendol-itxura mantentzen du haren bihotzak. Santa Maria katedrala buru duen muinoan, garai bateko artisau-lanbideen izenak gordetzen dituzte kaleek (errementari, zapatari, aiztogile, pintore), baita hamaika eraikin eder ere. Tenplu gotiko, jauregi eta dorreak zain edukiko dituzu.

Muinoaren alderik altuenean, jatorrizko hiria kokatzen tokian, estilo gotikoko tenplu hau dago, UNESCOk Gizadiaren Ondarea izendatu zuena. XII. mendean eraikitako katedrala eraberritze-prozesuan dago egun, eta milaka pertsonak bisitatu dituzte dagoeneko bertan gauzatzen ari diren obrak.

Berreskuratutako berdegune eta bideek eratzen dute eraztun berdea, balio ekologiko eta paisajistiko handiko txoko ugari lotuz. Hau da, oinezko zein txirrindularientzako sei parke handi eta, guztira, ia 80 km-ko ibilbideak. Eraztun berdera erraz hel daiteke Gasteizko edozein auzotatik, hiriko bidexka eta bidezidorrak hartuta.

Gasteizek eskaintza gastronomiko zabala eta askotarikoa du: pintxotan joateko aukera dago, mokadutxo bakarrean zapore, testura eta kolore ezberdinez gozatzeko, Arabako Errioxako ardo ezin hobeaz lagunduta; edo prezio egokian kalitatea eta aniztasuna eskaintzen dituzten jatetxeetan eseri gaitezke lasai-lasai.

Erabilera anitzeko eraikin handi, moderno eta erosoa da Europa jauregia. Bertan, besteak beste, 20 lantalde baino gehiago bil daitezke aldi berean, eta 5.700 pertsonarentzako gaitasun operatiboa du. Baina badu beste berezitasun bat ere: landarez apaindutako estalkia, arkitektura jasangarriaren erreferentzia bihurtua.